Креирање на стандардите

» Во март 1994 година салонот на автомобилите во Женева беше место на претставувањето на нов смел тип возило кое го преобликуваше автомобилскиот пејсаж – компактен SUV со погон на сите тркала заснован на самоносечка каросерија. Toyota RAV4 навистина беше оригинално ново решение осмислено како агилно и практично возило за потребите на современиот начин на живот. RAV4 од самиот почеток наиде на исклучително позитивен прием и глобално го рашири терминот SUV кој во тоа време беше невообичаен. Како победник по вкусот на купувачите ширум светот со преку 14 милиони продадени примероци, овој револуционерен компактен SUV со изглед кој го издвојуваше од сите други во 1994 година ги постави темелите на сегментот и веќе три децении неуморно ги предвидува променливите барања на модерниот живот. Прераснувајќи од компактен и агилен предводник на трендовите до возило кое нуди решенија за водечка практичност и удобност во класата во текот на петте генерации стана икона меѓу SUV моделите непрестајно прилагодувајќи се и подготвено прифаќајќи ги новите технологии за да ги следи очекувањата на купувачите кои во 2018 и 2019 година го крунисаа како најпродаван SUV на глобално ниво.

Идеите на кои настана RAV4 (што е акроним од Recreational Active Vehicle with 4-wheel drive – активно возило за рекреација со погон на четирите тркала) прв пат беа прикажани во концептот RAV-Four претставен на салонот во Токио 1989 година, што укажува на тоа дека Toyota подолго време создаваше план за компактен теренец со погон на сите четири тркала. Тогаш тоа беше само дизајнерска студија, без детали потребни за развој на сериски модел, но наиде на одушевување на јавноста. Официјално проектот доби зелено светло во 1991 година. Во развојот на првата верзија на RAV4 јапонските конструктори ги следеа јасно специфицираните цели останувајќи верни на оригиналната визија – новиот модел требаше да обезбеди голем простор во внатрешноста на каросерија со компактен, спортски и препознатлив дизајн. Овој нов тип возило го постави возачот на подигната позиција за седење овозможувајќи подобра прегледност и така пружајќи посигурно возење. Теренските способности беа надополнети со перформанси и удобност на пат, истовремено исполнувајќи ги највисоките стандарди за безбедност и еколошките карактеристики. На основа на тие принципи RAV4 доби личен печат и го востанови SUV сегментот, менувајќи се во текот на петте генерации и непрестајно развивајќи се според промените на вкусот на купувачите.

Иновациите кои беа во средиштето на неговиот развој во текот на сите пет генерации беа нагласени со брзо усвојување на ефикасните погонски технологии. Нагласувајќи го својот сестран пристап за неутрални емисии на јаглен диоксид, Toyota одлучи да понуди низа погонски агрегати кои одговараат на специфичните потреби на купувачите, пазарните услови и локалната инфраструктура. Посветеноста за истражување на нови решенија за намалување на влијанието на животната средина беше нагласена уште во 1997 година кога на одредени пазари беше пуштена во продажба електрична верзија. Во третата генерација 2016 година постоечката линија ефикасни бензински и дизел мотори беше дополнета со хибридна погонска група, а во 2020-тата во гамата влезе и плаг-ин хибридот. Овие електрифицирани опции помогнаа дополнително да се подобри доживувањето на возењето на RAV4. Паралелно со тоа, со употреба на нови платформи и подобри технички решенија на ослонувањето, Toyota со секоја генерација донесуваше уште побезбедно, помирно и подобро возење.

Напредокот не запре на перформансите и ефикасноста – се подобруваа и практичните страни на возилото. Внатрешноста со секоја генерација беше унапредувана и стануваше сé попространа и попријатна. Кај RAV4 безбедноста на патниците и другите учесници во сообраќајот секогаш беше приоритет. Како дел од решеноста на јапонскиот производител и напредните безбедносни решенија да ги направи достапни на сите, со текот на годините најновите Toyota Safety Sense системи стануваа достапни кај RAV4, помагајќи им на возачите да избегнат многу вообичаени ризици од сообраќајни несреќи.

Прва генерација (1994-2000)

Првиот RAV4 јапонските дизајнери го креираа со смел и забавен изглед со допадливи облини и единствени линии, кршејќи ги општоприфатените конвенции. Резервното тркало поставено назад ги наговестуваше теренските способности. Едноставно, новиот стил беше добро прилагоден и за рурални и урбани опкружувања. Во својот оригинален облик RAV4 беше компактен модел со три врати, долг само 3,69 m. Силата доаѓаше од 2,0 литарски бензински мотор со 129 KS поставен попречно, а погонот, секако, беше на сите четири тркала. Каросеријата беше самоносечка а задното ослонување независно. Високата позиција на возачот овозможуваше подобра видливост, а неговата компактна големина лесно маневрирање. Управливоста и удобноста на патниците повеќе сличеа на карактеристиките на хечбек отколку на теренец. Годината 1995-та гамата беше проширена со верзија со пет врати со должина од 4,1 m, а како опција се појави и погон само на предните тркала. Следеше варијанта со мек покрив, а во 1997-мата на некои пазари започна продажбата на модел со електричен погон со скромни 63 KS и никел-метал хидридни батерии поставени под подот кои даваа автономија од приближно 200 km. Оваа верзија се произведуваше до 2003 година.

Втора генерација (2000-2006)

Новиот милениум ја донесе втората генерација на RAV4 развиена на основа на стекнатите искуства. Новата платформа, новото ослонување и новиот перманентен погон на сите тркала со централен диференцијал со ограничено пролизгување резултираа со енергично и удобно возење како на пат така и надвор од него, додека комфорот со кој се одликуваше внатрешноста доби премиум чувство. Новата опрема и различните конфигурации на задните седишта ја зголемија функционалноста на кабината. Чекор кон одржливоста е направен со широка употреба на материјали кои лесно се рециклираат, но и веќе рециклирани материјали. Должината беше малку зголемена, а во понуда беа два бензински мотора, 1,8 литарски со 123 и 2,0 литарски со 150 KS на кои набргу им се придржи и дволитарски дизел со директно вбризгување и 116 коњски сили.

Трета генерација (2006-2012)

Третата генерација на Toyota RAV4 порасна и еволуираше добивајќи нов помодерен изглед. Одразувајќи ги промените во навиките и барањата на купувачите новиот модел имаше исклучиво пет врати. Беше направен на целосно нова платформа која му даде должина поголема за 19 cm, додека за некои пазари се нудеше и верзија со подолго меѓуоскино растојание. Системот за погон на сите четири тркала имаше електронски контролирана спојка која работеше автоматски во согласност со брзината на возилото, притисокот на педалата за гас и свртеноста на управувачот. Теренските можности дополнително беа унапредени со системите за контрола на возењето на надолници и помош при тргнување на нагорници. Проширен беше и изборот бензински мотори кои ги имаше со работна зафатнина од 2,0 до 3,5 литри, додека дизелот беше нов 2,2 литарски.

Четврта генерација (2013-2018)

И четвртата генерација на RAV4 значително порасна, што обезбеди многу поголем багажник во однос на претходниот модел. Потполно новото ослонување ја подобри удобноста и го намали оптоварувањето на возачот, а напредната технологија за погон на сите тркала имаше интелигентен систем на динамичка контрола вртежниот момент. Изборот на погонските склопови првобитно се состоеше од 2,0 и 2,5 литарски бензински и 2,0 и 2,2 литарски дизел мотори, а од 2016 година беше понудена и хибридна верзија со вкупна сила од 197 KS и електронски погон на сите четири тркала. Покрај перформансите, тој беше заслужен и за најмалата потрошувачка на гориво во класата и ниски емисии на CO₂.

Петта генерација (2018)

Моќниот стајлинг на петта генерација на RAV4 ги нагласуваше робусноста и квалитетот на возните способности кои отсекогаш ги дефинираа карактеристиките на овој SUV. Изведен на новата TNGA платформа беше лесен и имаше ниско тежиште, што со моќното подвозје овозможуваше исклучителна управливост и стабилност. Ја доби четвртата генерација на хибридната технологија на Toyota чија основа е 2,5 литарски бензински агрегат. Во 2020 година понудена е и плаг-ин хибридна верзија со моќни 306 KS.