Чешки Porsche

» Škoda инстантно ги освои реакциите на јавноста кога во 1970-та година го претстави спортското купе 110 R со мотор сместен назад, атрактивен изглед, не баш ниска цена и динамични возни својства. Тешко само 880 килограми, располагаше со 1,1 литарски мотор чиј блок беше произведен со современа постапка за леење на алуминиум, со двоен карбуратор и 52 коњски сили. Имаше 14-инчни тркала, диск сопирачки напред, забрзуваше до 100 km/h за 19 секунди и лесно постигнуваше 145 km/h. Просечната потрошувачка на гориво изнесуваше 8,5 литри на 100 km, а резервоарот од 32 литри беше сместен напред под предната хауба, каде имаше и 250 литри простор за багаж. Во впечатливиот ентериер во првите автомобили доминираше арматурна табла од дрво, која набргу беше заменета со мат црна завршна обработка. Беше добра основа и за тркачките возила на марката кои појавувајќи се на бројните натпревари го добија прекарот чешки Porsche. Вкупно меѓу 1970 и 1980 година во фабриката во Квасини се произведени 57.085 примероци на ова чешко купе за сите времиња од кои огромен број се извезени – некои возила стигнаа дури и на Нов Зеланд, во Кувајт и Никарагва.