Бубрежна доминација
» По ланската премиера на новата серија 3, никој не можеше да претпостави дека купе варијантата ќе навлезе во нови дизајнерски полиња, дека ќе ја изгуби трагата од својот механички донатор и дека силно ќе раскрсти со својот претходник. Носител на новата визуелизација е маската на која доминираат традиционалните бубрези, но сега во XXL формат. Променетите пропорции само го дополнуваат спортскиот впечаток.
Габарити
Должината на серијата 4 на BMW од 477 cm (+12,8 cm), широчината од 185 cm (+2,7 cm) и височината од 138 cm (+0,6 cm) јасно ја покажуваат намерата да се угоди на возачите кои преферираат чисто спортско доживување. Зголеменото меѓуоскино растојание (285 cm) би требало колку-толку да го ублажи недостатокот на простор на задната клупа, но за рамноправен третман на патниците сместени на тие позиции три и четири сепак ќе мора да се попричека Grand Coupe верзијата. Во согласност со имиџот е конципирана и опремата. Кожениот ентериер со спортски управувач и седишта доаѓа како стандардна опрема, исто како и комплетното LED осветлување, поголемиот хед-ап дисплеј, ветробранското стакло со посебна акустична изолација, трозонската климатизација…
Бидејќи серијата 4 е дизајнирана како машина за задоволство при возење, во неа се вградува и систем за подесување на ослонувањето. За поголема крутост инженерите имаат интегрирано дополнителни стабилизатори во моторниот простор кои практично ги има насекаде околу моторот. Постојат и дополнителни зацврстувачи на задната оска. Споредено со седанот од серијата 3, купето е за 21 милиметар пониско.
Моторизација
Три бензиски и еден дизел мотори се во првичниот налет на серијата 4. Тие се комбинираат со шестстепени мануелни или пак со осумстепени автоматски менувачи. Интегралниот xDrive погон е достапен само кај M440i и 420d, додека Mild Hybrid технологијата (11 KS) не е на располагање само кај дволитарскиот бензинец. Ова се техничките податоци за нив. Од идниот март понудата ќе биде дополнета со 430d и M440d xDrive кои ќе имаат трилитарски дизел, првиот со 286 а вториот со 340 KS.
| 420i | 430i | M440i xDrive | 420d | 420d xDrive | |
| цилиндри/вентили | 4/4 | 4/4 | 6/4 | 4/4 | 4/4 |
| зафатнина | 1.998 cm³ | 1.998 cm³ | 2.998 cm³ | 1.995 cm³ | 1.995 cm³ |
| гориво | бензин | бензин | бензин | дизел | дизел |
| силина | 184 KS | 258 KS | 374 KS | 190 KS | 190 KS |
| при вртежи | 5.000-6.500 | 5.000-6.500 | 5.500-6.500 | 4.000 | 4.000 |
| вртежен момент | 300 Nm | 400 Nm | 500 Nm | 400 Nm | 400 Nm |
| при вртежи | 1.350-4.000 | 1.550-4.400 | 1.900-5.000 | 1.750-2.500 | 1.750-2.500 |
| 48-волтна Mild-Hybrid технологија | – | – | 11 KS | 11 KS | 11 KS |
| перформанси | |||||
| забрзување 0–100 km/h | 7,5 секунди | 5,8 секунди | 4,5 секунди | 7,1 секунда | 7,4 секунди |
| максимална брзина | 240 km/h | 250 km/h | 250 km/h | 240 km/h | 238 km/h |
| потрошувачка | |||||
| во град | 6,6-7,2 l/100 km | 7,3-7,7 l/100 km | 8,6-9,0 l/100 km | 4,5-4,9 l/100 km | 4,8-5,2 l/100 km |
| на отворен пат | 4,6-5,0 l/100 km | 4,8-5,3 l/100 km | 5,7-6,0 l/100 km | 3,6-3,9 l/100 km | 4,0-4,2 l/100 km |
| просек | 5,3-5,8 l/100 km | 5,7-6,1 l/100 km | 6,8-7,1 l/100 km | 3,9-4,2 l/100 km | 4,3-4,6 l/100 km |
BMW ја произведува серијата 4 во својата најголема европска фабрика во Динголфинг, Германија.
