Првиот сериски автомобил со пет цилиндри

» На денешен ден 1974 година Mercedes го претстави моделот 240 D 3.0, првиот сериски автомобил со пет цилиндри. Настапувајќи како пионер на моќните современи дизел автомобили овој претходник на Е-класата ги постави темелите на кои имиџот на Mercedes и ден денес почива. Изведен од издржливиот 2,4 литарски дизел мотор со додавање на уште еден цилиндар, неговиот агрегат имаше работна зафатнина од три литри од која извлекуваше едвај 80 коњски сили. Но тогаш со нив беше најбрзиот сериски дизел автомобил – до стотка забрзуваше за 19,9 секунди а постигнуваше максимални 148 km/h. Колку за информација, трошеше 10,8 литри на 100 километри. Од вкупно произведените скоро два милиона примероци од оваа серија на Mercedes, 53.690 беа со него.