Овие работи треба да ги проверите
» Ова се неколку совети за основните работи кои треба да ги средите пред зимата навистина да дојде. Една од најбитните, ако не и најбитна за да се не случат скапи дефекти ако студот стегне со сите свои заби, е проверката на течноста за ладење односно антифризот, што мора да го направите со апаратче за тоа. Со оглед на нашите температури, доволно е таа да издржува меѓу -30 и -20 степени под нулата, колку повеќе толку подобро посебно ако возилото преку ноќ го чувате на отворено, на паркинг место во гаража. Сфатете го ова навистина сериозно.
Проблем со замрзнувањето може да има и течноста за чистење на ветробранското стакло, која не е иста за лето и зима – онаа летната има повеќе детергент за миење на мушичките, а зимската пак алкохол против замрзнување. Затоа кога досипувате внимавајте да биде онаа вистинската, прописно означена дека е за минусни температури, а не онаа што ви останала од порано. А кога хаубата веќе е отворена проверете го и нивото на маслото – не е поврзано со зимата но ако е опаднато тоа може да биде знак дека со моторот нешто не е во ред и дека и тој треба да се провери.
Следни на ред се бришачите кои ние ги запоставуваме дури и откако ќе си го изживеат својот век на траење. Дека не се како треба забележуваме кога врне, но во тој момент кога ќе застанеме забораваме на нив. Сијаличките пак никогаш не ги проверуваме, а треба – откажаните светла тешко се забележуваат, посебно ако возиме претежно низ град. Оние назад пак не ни можеме да забележиме дека откажале. Типичен зимски проблем е и акумулаторот кој ако е стар може да откаже послушност наеднаш, без предупредување, после само една студена ноќ. Не дозволувајте да ве изненади некое рано утро кога веќе доцнете на работа.
За зимската опрема сега нема да зборуваме, таа се подразбира, но ќе споменеме да го проверите притисокот на воздухот во пневматиците. Имено и да е сосема добар, тој на студено време се намалува за 0,1 или 0,2 бари. Проверка на истрошеноста на диск-плочките сигурно нема да направите, но сторете го тоа ако ги менувате летните пневматици со зимски. Ако пак сте темелен, проверете ги и рачната сопирачка и состојбата на ослонувањето – добрите рамења, стабилизаторот, гумените елементи и амортизерите се гаранција за безбедно и удобно возење како на лето така и на зима.
